როგორ შევარჩიოთ გეინერი.

გეინერი დანამატია, რომელიც მასის მომატებისთვისაა შექმნილი. გეინერის შემადგენელია ნახშირწყლები და პროტეინები. ხშირად ამატებენ ვიტამინებს, კრეატინს და სხვა ნივთიერებებს, გეინერის მახასიათებელია ნახშირწყალის და პროტეინის თანაფარდობა. გეინერის ეფექტურობა დამოკიდებულია მის შემადგენლობაში არსებული ნახშირწყლების სტრუქტურაზე.

თუ გეინერის შემადგენლობაში ნახშირწყლები წარმოდგენილია ძირითადად მარტივი ნახშირწყლებით – მონოსაქარიდებით, მაშინ ასეთი გეინერი თქვენ უფრო ცხიმს მოგიმატებთ, ვიდრე კუნთოვან მასას. გაცილებით ხარისხიანია გეინერი რთული ნახშირწყლებით – ის შედგება რთული მოლეკულური სტრუქტურის მქონე პოლისაქარიდებისგან. პოლისაქარიდებისგან გეინერის დამზადება მწარმოებლებს უჯდებათ ძვირი, ამიტომ ისინი იყენებენ მარტივ ნახშირწყლებს. ასეთი გეინერის კალორაჟი კი იქნება იგივე რაც პოლისაქარიდებზე დამზადებული გეინერის, მაგრამ მისი ეფექტურობა იქნება გაცილებით დაბალი.

მონოსაქარიდებზე დამზადებული გეინერის ხშირი გამოყენება უარყოფითად იმოქმედებს ინსულინის სეკრეციაზე და შეიძლება (თუ არის ორგანიზმის მიდრეკილება) დიაბეტის მაპროვოცირებელიც გახდეს. იმის დადგენა, თუ რომელი ნახშირწყლებია გეინერში გამოყენებული, არაა ადვილი, რადგან მწარმოებლები ხშირად არც თუ პატიოსნად უთითებენ რთული და მარტივი ნახშრწყლების პროცენტულ შემცველობას. მონოსაქარიდების დიდი რაოდენობის ერთერთი მაჩვენებელი არის გეინერის ძალიან ტკბილი გემო. რაც მეტია პოლისაქარიდები მით ნაკლებად ტკბილია გეინერი და ე.ი. ხარისხიანია. 

რა პრინციპით უნდა შეარჩიოთ გეინერი.

გეინერი მოქმედებს ყველაზე ინდივიდუალურად და უნდა გამოსცადოთ საკუთარ ორგანიზმზე. გეინერი შედგება ცილებისა და ნახშირწყლებისაგან (რამოდენიმე პროცენტი შედგება ვიტამინების, მინერალების და ცხიმებისაგან). სანამ შევარჩევთ გეინერს, უნდა ობიექტურად შევაფასოთ ჩვენი ორგანიზმი.

ავიღოთ ორი უკიდურესი შემთხვევა:

1. თქვენი მეტაბოლიზმი არის სწრაფი და ხართ ძალიან გამხდარი, რაც არ უნდა ჭამოთ ყველაფერი იქვე იწვება და არ აისახება თქვენს კუნთებზე. იმისათვის, რომ მოიმატოთ, თქვენ ნახშირწყლები უფრო გჭირდებათ, ვიდრე ცილები. ამიტომ შეარჩიეთ გეინერი ნახშირწყლების მაღალი შემცველობით, დაახლოებით 80%-მდე ნახშირწყალი და 20% ცილა.

2. თქვენ გაქვთ საკმაოდ ბევრი ცხიმი და თუ მიიღებთ გეინერს ნახშირწყლების დიდი შემცველობით, კიდევ უფრო მეტ ცხიმს დააგროვებთ კუნთის ნაცვლად. ამ შემთხვევაში გჭირდებათ ნაკლები ნახშირწყლების (20%) და მეტი პროტეინის (80%) შემცველი გეინერი. 

სხეულის მასის ინდექსი თუ ამ ორ კატეგორიას შორისაა, მაშინ გეინერიც შუალედური უნდა იყოს.

თუ უკვე შეარჩიეთ საჭირო შემადგენლობის გეინერი, ჯერ შეიძინოთ 2 კვირის მარაგი, ამ ვადაში ნახავთ რა შედეგი მოგიტანათ ამ გეინერმა. თუ დაინახეთ, რომ გიგროვდებათ ბევრი ცხიმი (2 კვირაში მოიმატეთ 1-1.5 კგ. და მუცლის გარშემოწერილობამაც მოიმატა) ე.ი. თქვენ გჭირდებათ გეინერი ნაკლები ნახშირწყლების და მეტი ცილებით (ან სულაც სუფთა პროტეინი).

თუ 2 კვირაში არაფერი არ ხდება ან დოზაა პატარა, ან ზედმეტად ცილოვანია და დაგაკლდათ ნახშირწყლები. ჯერ გაზარდეთ დოზა და მერე შეაფასეთ.

თუ წონა არ იცვლება, მაგრამ უმჯობესდება გარეგნობა და მაქსიმალური შედეგები ცალკეულ ვარჯიშებში, ეს უკვე საუკეთესო ვარიანტია. ცხიმი ჩაანაცვლა კუნთმა – სხეულის წონა არ იცვლება, მაგრამ იცვლება სხეულის მასის ინდექსი (ცხიმისა და კუნთის თანაფარდობა).

თუ იმატებს წონა (1-2 კგ. თვეში), ძალა, შედეგები სხვადასხვა ვარჯიშებში, გაუმჯობესდა კუნთის გარეგნული შესახედაობა ე.ი. ეს არის თქვენი გეინერი გარკვეული დროით, სანამ ზრდა არ შეჩერდება.

გამორიცხულია გეინერის გამო წონის დაკლება, ეს უკვე სხვა ფაქტორებით იქნება გამოწვეული.

გაითვალისწინეთ, რომ მშრალი კუნთის მასის მომატება შეუძლებელია ცხიმის დაგროვების გარეშე. მთავარია ის არ იყოს დიდი. ორიენტაცია გქონდეთ თვეში 2 კგ–ის მომატებაზე ოდნავი გადახრებით, ეს არის ნორმალური ზრდის საშუალო მაჩვენებელი.