რატომ ვიმატებთ უფრო მეტს ყოველი მომდევნო დიეტის შემდეგ და რატომ ხდება გახდომა უფრო ძნელი.

საუბარია ე.წ. საქანელაზე, როცა ადამიანი ხან იმატებს წონაში, ხან ხდება. მერე ისევ იმატებს 10 კგ. და ისევ ხდება. მორიგი დიეტის მერე იმატებს უკვე 15 კგ. და ა.შ. ყოველი მომდევნო დიეტის მერე უფრო მეტს იმატებს წონაში და გახდომა თანდათან უფრო ძნელი ხდება.

რატომ არის ასეთი საქანელა ცუდი?

გახდომისათვის, ანუ ცხიმის წვისთვის აუცილებელია კუნთები. რაც მეტი გვაქვს კუნთები, მით მეტ ენერგიას ვხარჯავთ, მით მეტია ჩვენი მეტაბოლიზმი და მით უფრო ადვილად ვწვავთ ცხიმს. რაც უფრო ნაკლებია კუნთები, მით უფრო ძნელია ცხიმის დაწვა. კუნთები ძილშიაც კი მოითხოვენ ენერგიას, ორგანიზმი მუდმივად ხარჯავს ენერგიას კუნთების მუშაობისთვის, მათი შენარჩუნებისთვის. ამიტომ, რაც მეტია კუნთები, მით უფრო ადვილია გახდომა.

გახდომისას დაიცავით სწორი კვება და ივარჯიშეთ, რათა შეინარჩუნოთ კუნთები. ანუ წონაში ისე უნდა დაიკლოთ, რომ დაწვათ უფრო მეტად ცხიმი და არა კუნთები, რადგან გახდომისას კუნთების ნაწილი ყოველთვის იწვება.

რა ხდება დიეტის შემდეგ: დიეტის შემდეგ როცა გადადიხართ ძველებურ კვებაზე და არ ვარჯიშობთ, იმატებს მარტო ცხიმი. როცა ხდებით, ცხიმთან ერთად წვავთ კუნთებსაც და რაც უფრო ხშირად აკეთებთ დიეტას, თანდათან უფრო მეტ კუნთს კარგავთ და აგროვებთ მხოლოდ ცხიმს. ცხიმს წვავს კუნთები და რადგან ისინი უკვე დაწვით, გახდომა თანდათან უფრო რთულდება.

რამოდენიმე ასეთი გახდომის შემდეგ გახდომა უფრო რთული ხდება, რადგან ყოველი მომდევნო გახდომის შემდეგ კუნთები უფრო ცოტა რჩება და ცხიმი უფრო მეტი. აი ეს არის საქანელას ეფექტი.

აქედან არის ერთადერთი გამოსავალი: არ უნდა გახდეთ რაიმე თარიღისთვის, ან მოვლენისთვის, მაგ. ზაფხულისთვის, ან ქორწილისთვის და ა.შ. არასდროს არ დაჯდეთ დიეტაზე და არ დაელოდოთ როდის დამთავრდება დიეტა, რომ დაიწყოთ ჭამა. ერთადერთი გამოსავალია სამუდამოდ შეცვალოთ თქვენი ცხოვრების წესი, გადადით სწორ კვებაზე და ივარჯიშეთ.