სპორტული კვების შესახებ.

სპორტული კვება არის ჩვეულებრივ კვებაზე დანამატი და ის ვერ შეგიცვლით საკვებ პროდუქტებს. ასევე არ უნდა ავურიოთ ერთმანეთში სპორტული კვება და ფარმაკოლოგიური პრეპარატები.

აუცილებელი სპორტული კვების დანამატები, რომელიც დაგჭირდებათ მასაზე მუშაობისას:

1. ვიტამინების და მინერალების კომპლექსი.

სპორტსმენები ხარჯავენ 2-3-ჯერ მეტ ვიტამინებს და მინერალებს, ვიდრე ჩვეულებრივი ადამიანი, მათი ორგანიზმი განიცდის მათ ნაკლებობას, რაც იწვევს შედეგების შეჩერებას, ძალების გამოფიტვას და ა. შ. ამიტომ მათ უნდა შეავსონ ეს დეფიციტი მუდმივად – შესვენებებით (ერთი კურსი, შემდეგ ერთი თვე შესვენება), რათა ორგანიზმი არ გადაეჩვიოს საკვებიდან ვიტამინების და მიკროელემენტების ათვისებას.

2. კრეატინი.

სპორტული კვებიდან ყველაზე ეფექტურია კუნთის მასის ზრდისთვის. ის ზრდის ძალას, გამძლეობას და კუნთოვან მასას. კრეატინი აკავებს წყალს კუნთის უჯრედებში, რითაც ზრდის კუნთის მოცულობას.

კრეატინის მიღების წესი.

კრეატინით ჩატვირთვის ფაზა ზოგიერთი ექსპერტის აზრით მწარმოებლის მარკეტინგული სვლაა გაყიდვების გასაზრდელად. კრეატინის მიღების ოპტიმალური დროა დილით უზმოზე, ან ვარჯიშის შემდეგ ტკბილ წყალში გაზავებული 5 გრ. ოდენობით. 2 თვიანი კურსის შემდეგ ისვენებთ ერთ თვეს, შემდეგ ისევ შეიძლება 2 თვიანი კურსის გამეორება. კრეატინის მიღების პერიოდში სვით ბევრი წყალი, 2-3 ლ. დღეში. ამ პერიოდში მოერიდეთ კოფეინის შემცველი პროდუქტების მიღებას.

3. პროტეინი.

კუნთოვანი მასის ზრდისთვის საჭიროა ყოველ 1 კგ. საკუთარ წონაზე 2 გრ. ცილის მიღება დღეში. ამდენი ცილის მიღება მარტო საკვებიდან რთულია. თუ ვერ ახერხებთ დღეში 5-ჯერ ჭამას, გამოიყენეთ პროტეინის კოქტეილი, რომლის 1 პორცია შეიცავს 30 გრ. ცილას.

პროტეინის მიღების წესი.

არსებობს პროტეინის 2 ყველაზე ეფექტური სახეობა – შრატის და კაზეინის. შრატის პროტეინს ორგანიზმი ითვისებს სწრაფად, კაზეინის პროტეინს 7 სთ. შრატის პროტეინს იღებენ გაღვიძებისთანავე, ან ვარჯიშის მერე, მაშინ როცა ორგანიზმი გამოფიტულია. კაზეინის პროტეინი უმჯობესია მაშინ, როცა ჩვენ დიდხანს ვერ მივიღებთ საკვებს – ძილის წინ და ვარჯიშამდე. მეტი ეფექტურობისთვის შრატის პროტეინის 1 პორცია მიიღეთ ვარჯიშის მერე, ხოლო კაზეინის ძილის წინ.

4. BCAA.

ეს არის შეუცვლელი ამინომჟავების – ლეიცინი, იზოლეიცინი, ვალინი კომპლექსი, რომელიც იცავს კუნთებს კატაბოლიზმისგან (დაშლისგან) და ხელს უწყობს ანაბოლური პროცესების გააქტიურებას. ისინი არ სინთეზირდება ჩვენს ორგანიზმში და მათი მიღება შესაძლებელია მხოლოდ საკვებიდან ან დანამატებიდან. BCAA ეფექტურია ასევე ძალის მომატებისთვის და ორგანიზმში ცხიმის შემცირებისთვის.

BCAA-ს მიღების წესი.

BCAA შეგიძლიათ მიიღოთ ვარჯიშის წინ, ვარჯიშის დროს და ვარჯიშის შემდეგ, თითო პორცია 5-10 გრ.

5. ომეგა – 3.

ომეგა 3 არის ნახევრად არანაჯერი ცხიმოვანი მჟავების კომპლექსი, რომელიც მნიშვნელოვანია როგორც ჩვენი ჯანმრთელობისთვის, ასევე კუნთის მასის ზრდისთვის და ცხიმის დასაწვავად.

ომეგა – 3-ს მიღების წესი.

მიიღეთ დილით საუზმის შემდეგ 1 გრამი.